هييييييييييييه واجب

هذا الواجب من الجميله رحاب

بس ايه واجب على حق

منا طول عمرى بدى واجب للعيال وبعاقبهم لو معملهوش

معلش بقى يا رحاب

انا اتأخرت فى عمايل الواجب

اوعى تضربنى اقول

وقفنى طول الحصة وبلاش تضربنى

علشان ايدى هتوجعنى

السؤال الاول : أذكر اسم من طلب منك حل هذا الواجب؟

طلبته منى رحوب صاحبه مدونة فى حب الله

ويااااااارب اعرف اعمله

السؤال التانى : أذكر القوانين المتعلقة بهذا الواجب؟

هو قانون واحد مشهور عند كل الناس

if you want happy

ارمى الكتاب وصلى على النبى

السؤال الثالث : تحدث عن ستة أسرار قد لا يكتشفها من يقابلك للمرة الأولى؟

1) ممكن اى حد يتخم فيا ويفتكرنى هادية بس مجرد ما اتعود عليه يعرف الحقيقة المرة

2) بيبان عليا انى جريئة ومش بيهمنى حاجة بس أنا من جوايا ببقى خايفة جدا جدا

وبحاول اتماسك علشان ميبنش أى نقطة ضعف ليا

3) ناس كتير بتفتكر أن دماغى طئه وانى مبعرفش اتكلم جد

بس لا

أنا اه بحب الهزار بس برضه وقت الجد جد ولما حد يتكلم معايا فى موضوع بيلاقى واحده تانية

غير رودى المرووشة

4) صدقاتى المتعددة تعطى انطباع انى حبيت كتير قوووووووى

بس انا فى الحقيقة محبتش فى حياتى كلها الا مرة واحده

وكانت احلى سنه قضيتها فى حياتى كلها

5) انا ممكن انصح الناس كلها لكن معرفش انصح نفسى

ومتردده فى أى حاجة تخصنى لأنى بخاف قوى من الفشل

6)لما بحط حاجة فى دماغى بعملها أيا كانت الحاجة دى

وأيا كانت نتائجها ولما بتكون نتيجة افعالى خطأ

بقعد اقول لنفسى احسن علشان مأخدتيش بالك من كذه وكذه وكذه

لكن لو نتيجة افعالى حاجة كويسة يااااااااااااه على الفرح والظئططه اللى ببقى فيها

السؤال الرابع والاخير : حول هذا السؤال الى ستة مدونين

وأذكر اسماءهم مع روابط مدوناتهم فى موضوعك؟

اممممممممممممممممممممم

استنوا كدة لما افكر

بصوا احسن حاجة

اول سته مدونين يعلقوا عندى ليهم الواجب ده هديه

سوفنير يعنى

والنبى قبل الهدية

الحب أو الزواج

الحب أو الزواج

صعب قوى أنك تشيل الألف من حرف ( أو) ونخليها

الحب و الزواج

تحس انها معادله صعب جدا انك تحققها

وكتير قوى من بنات اليوم بيقولولى

(يا بنتى الحب حاجة والجواز حاجة تانية)

بس حتى هذه اللحظه لم اقتنع بتلك المقولة

ولم اقتنع بأن الحب كلام افلام

صحيح أن شباب هذا اليوم مرووش حبتين

ومش بيتحمل مسئولية

وبيفضل يحب ويهيم على وجه فى الحب كتير

الا انه عندما يصل به الحب الى الزواج

تبدأ اجراس ناقوس الخطر فى الدق

وتجده يفكر مليون ألف مرة

قبل اتخاذ هذا القرار

بل وتجده يظهر كل عيوب الحبيب امامه

بدون اى مميزات أو أولويات

حتى يصل به المطاف الى نهاية هذه القصة الجميلة

بنهايه مؤلمة لعينة

ومع كل ذلك لسه عندى أمل

ولسه مؤمنة بأن الزواج بدون حب خطأ كبير

وأن الزواج هو الترجمة النثرية لقصيدة حب جميلة

من انا؟

يعنى يا ربى أول تاج ليا يبقى صعب كده

ماشى يا بريك

ايه يا رودى وانا عملتلك ايه

اصل اصعب حاجة ان حد يتكلم عن نفسه

لانه لو اتكلم حلو هيقولوا عليه مغرور

ولو اتكلم وحش هيقولوا عليه مبيثقش فى نفسه

عموما انا هتكلم وسيبوا اللى يقول يقول بقى

استعنى على الشقى بالله

أولا : أكتب عشر اشياء عن نفسك

------------------------

1-اسمى رودينا

وبشتغل مدرسة دراسات اجتماعية فى مدرسة ابتدائى

وبلاش اقولكم على اسم المدرسة لأن اسمها وحش قوى

2-وانا صغيرة مكنتش بحب اسمى خالص

لان فى ناس كتير كانت فاكرانى مسيحية فكنت بضايق وأقول لماما

فبقت تلبسنى ما شاء الله علشان يعرفوا

وبرضه مفيش فايده

3-مشكلتى انى رقيقة ودلوعة والله مش بصطنع بس انا كده

لأن بابا الله يرحمه كان بيدلعنى كتير قوى

وكنت لما اتكلم زى اخواتى الصبيان حبه كان يزعقلى

ويقولى انتى بنوته والمفروض انك تكونى رقيقة

بس المشكله الاكبر ان مستر وليد زميلى فى المدرسة بيقولى يا بنتى حرام عليكى

هتخلصى رصيد الرقة والدلع اللى عندك وتقلبى على دكر بعد الجواز

4-اللى يشوفنى وميعرفنيش يقول عليا تكنه وهاديه

بس اللى يتعامل معايا يحس بكمية الشقاوه والشيطنة اللى مخزونة عندى

5-بحب قوى ازاول الناس وخصوصا اصحابى وبعمل فيهم مقالب كتير قوى

ودايما اعمل فيهم كل حاجة واقولهم كذبه ابريل بس من الواضح ان الشهور عندى كلها ابريل

ومع ذلك أنا بكره الكذب جدا جدا جدا ومش بسامح بسهوله

6-من مواليد شهر واحد شهر العباقرة يعنى

ده انا طبعا انا عارفه والله من غير ما تشاوروا علياو تقولوا عبقرينوا

7-انا مواليد برج الدلو برج هوائى وانا فعلا كده

الحاجة اللى احبها انهارده اكرها بكره ومن السهل انك تقنعنى بأى حاجة

وتضحك عليا بمصاصة هههههههههههه

8-بحب جدا الحرية والاستقلال والصداقات المتعددة

واحب اعمل اللى انا عايزاه بدون اى قيود ومحبش حد يفرض عليا رأيه

او يفرض عليا اى حاجة لأنى عنيده جدا ومبنفذش الكلام طول ما أنا مش مقتنعه به

9-ذاكرتى ضعيفة نسبيا علشان كده تلاقينى دايما عاملة رسائل تذكير على الموبايل

ولما بيرن مش بفتكر انا كنت عملاها ليه اساسا

وتلاقينى قاعده افتكر انا عملت الرساله دى امتى علشان افتكر ايه هو اللى انا عايزه افتكرة

10- بحب بابا وبدعيلى دايما بالرحمة

وبحب ماما واخواتى واصحابى وبحبكم كلكم

ثانيا : وجه التاج لخمس تانيين

---------------------------

مأتشرين

شهد الحب

فى حب الله

سفاح كرموز

حدوته