طبعا كلكم عارفين ان الوزير بتاعنا مصمم انه مش هيأجل التعليم
وانه شايف اننا نقدر لو حصل حاجة نواجهها بمنتهى السهولة
ياعم صلى أنت فى مصر
يعنى فى علاجات كفاية للشعب لما يتصاب
ومعندكش تلوث والاكل زى الفل بيغذى ويقوى المناعة
وعندك تطعيمات
الا صح بخصوص التطعيمات
اخر حاجة سمعتها اللى هيخدها يبقى على مسئوليه الخاصة
لانها بتسبب تلات حاجات مهمين جدا
أولا : السرطان
ثانيا : الزهيمر
ثالثا : الفشل الكلوى
يعنى تموت أحسن بالفيرس
ده غير أن الوزير قال بمنتهى السهولة لو طالب اتصاب فى الفصل او اتنين هنقفل الفصل
ده على اساس انه قاعد طول النهار فيه مش بختلط فى طابور وفسحه بالطلاب التانيين
ايه الذكاء اللى انتوا فيه ده الراجل كلامه واضح
انتوا مش فاهمين حاجة
انتوا هتفهموا اكتر منه
وعادى لو حصل جائحه فى المدرسة هتتقفل اسبوعيين
يرشوا فليت ويموتوا النمل والصراصير
وهتبقى المدرسة فله شمعه منورة مفيهاش فيروس ولا اى حاجة
ده كله كوم
وغسل ايد العيال كل نص ساعه كوم تانى
طبعا هو شىء كويس
بس احسبوها لو كل العيال نزلوا يغسلوا ايديهم كل نص ساعة
مش اسمه تجمع برضه
حتى لو اتقسموا كل مجموعه تنزل تغسل ايديها يبقى قدامك حل من الاتنين
يا تقف فى الحوش تلم العيال علشان يطلعوا الفصل
يا اما تشرح فى الحمام
على الاقل العيال هعيش حياتها ويذروطوا براحتهم
يا لهوووووووووووى
دى هتبقى سنه هنا والله
ولا فى شرح لا نيله
هو وجع قلب عالفاضى
عموما يا سياده الوزير المحترم نشكرك على هذا الجهد العظيم
ومش عايزة اقولك احنا بندعى عليك قصدى بندعيلك قد ايه
صراحه رايحتنا احنا والطلاب
عادى خالص ان الدراسة تشتغل طول الاسبوع
وان المدرس يطحن طول الاسبوع
عايزة اقولك لسيادتك حاجة
لو احنا حتى عندنا صحة
فهى خلاص بح
راااااااااااااااااااااااااحت
طبعا أنا عارفه ان فى حاجة اسمها قانون الطوارىء
بس مش على حساب صحتنا
واللى انا متأكده منه انه على الاقل
لو اتنين فى الفصل واحده عنده انفولنزا عادية والتانيه انفلونزا خنازير ادخل الفصل
فأنت كده قدمت للفيرس الجو المناسب لتتحور
وهتدوروا قريب على علاج جديد للفيرس الجديد
عموما مش هقدر أقول غير شكرا
والعيب مش فيك
*********************
عايزة كده اسألكم كام سؤال
ايه رايك فى التعليم فى مصر ؟
انتوا شايفين ان مهم قوى ان الطلاب يروحوا المدارس دلوقتى ؟
يحصل إية لو عملنا زى الدول العربية وأجلنا الدراسة؟
أخيرا وليس أخرا
لو انت كان وزير التعليم هتتصرف إزاى؟؟؟؟؟؟؟؟؟؟
**********************************
على فكرة ممكن بمناقشتنا دى نوصل لحل أحسن
على الأقل نأخد كلنا القرار
بدل ما نسيبه لفرد واحد بس هو اللى يأخده
