عندما ذهبت الى المدرسة الاسبوع الماضى
لكى نحضر انفسنا الى الترم التانى
وجدت ميس سناء الوكيله تنادى عليا
يا ميس رودينا
نعم يا ميس سناء
خدى امضى !!؟
امضى على ايه
عندك دورة تدريبة لمدة يوم واحد
انتى واسماء وميس فاطمه
ايوة يعنى هنعمل اية
قالتلى هنروحوا الساعة تسعه الصبح الادارة التعليمية
وهنحضروا التدريب ده حلو قوى هتستفيدوا منه
بجد والله يا حلولى
قلت بقى لنفسى احضر كل الاسئلة اللى عندى والمشاكل اللى بتواجهنى وانا بشرح
طالما ان الدورة فيها ناس متخصصين اكيد هيفدونى
المهم جه ميعاد التدريب
وروحت الصبح الادارة
واسئل الناس يا جماعه هو فين التدريب فى قاعة الاجتماعات
ايه ده شكله بجد
والله شكلهم بيحترمونا ومقدرنا
وروحت القاعة لقيت اسماء وفاطمه مستنينى فى القاعة
وقعدنا بتاع ربع ساعة نشوف اية اللى هيحصل
وبدا الساده المدرسين فى الحضور الى القاعة لحضور التدريب
وبعد ما اتخذ كل منا مقعده
جه الفراش يقولنا:
"يلاه يا اساتذة من فضلكم بره شويه"
نعم ليه
اصل احنا هنضف القاعة الاول
ليه هو انهاردة يوم التنضيف
ولقينا الموجه الاولى للقسم بتزعق لرئيس قسم التعليم الابتدائى
لانه عارف من الاسبوع الماضى انه فى تدريب
قعدنا نسلك شويه بينهم
وقعدنا بتاع نصف ساعة برة القاعة مستنين
وبعد كدة قلنا اتفضل بقى ادخلوا
ندخل فين بعد التراب العفارة اللى انت عملها دى
ودخلنا خير اللهم اجعله خير لقينا الدنيا بيظه والكراسى مليانة تراب
بصراحه يا جماعة بيحترمونا قوى
فى النهاية الحمد لله الدنيا اتضبطت وبدأ التدريب
وكان الحاضر الموجه الاولى لقسم الدراسات الاجتماعية
وموجه مسئول عن ملف الانجاز
وموجه قسم التعليم الابتدائى
ثم بدات الموجه الاولى فى الكلام
وقالت سوف ناخذ محاضرتان
الاولى بعنوان "ملف الانجاز وكيفيه تطبيقه"ا
والثانيه بعنوان "القصة التعليمية واستخدامها كوسيله للشرح"ا
ولوفى وقت هناخد محاضرة كمان عن الوسائل التعليمية
يييييييييييييييييي محاضرات تانى دحنا خلصنا الكليه خلاص
المهم بدأ الموجه فى شرح ملف الانجازوشرح مزاياه ولماذا تم تطبيقه
والكلام ده......؟
وقعد يقول "اننا اردنا ان نتفادى عيوب النظام القديم ونقوم بتطبيق نظام جديد
لكى يكون الطالب قادر على حل مشكلات المجتمع الذى يعيش
فيه وقادرعلى الابداع والتفكير السليم
ايه ده ايه الكلام الكبير اللى انت بتقوله ده
ماهى الشعارات دى قولتوها ميت مرة
تانى هترجعوا تعملوا نظام وبعد كام سنه تلغوه
المهم قعد يلوك بتاع ساعتين فى الموضوع ده
والحمد لله مطلعتش منه بحاجة اكتر من طريق التحضير الجديدة اللى ابتدعوها
والى المفروض اننا نكون بنحضر بيها من الترم الاول
بس مفيش ولا موجه بلغنا بيها
طيب وتاعب نفسك ليه يا راجل مكنت بعتها مع الموجه وخلاص
هيييييه انتهت المحاضرة الاولى
اخدنا بريك نصف ساعة كدة
وروحت صليت الظهر
جيت القاعة لقيت المحاضرة التانية شغاله
وفيها واحد ماسك كام ورقة وعمال يقرا منها
بفكرنى بدكتور كنت بكرهه ومش فاهمه من حاجة
صراحه الراجل محبش يطول علينا
ربع ساعة قرأ فيها الكام ورقة اللى فى ايده واقلب
طيب نستنى بقى المحاضرة التالتة
مفيش انتم كدة خلصتم كفاية عليكم كدة
بجد والله
ما شاء الله مفيش احسن من كدة نظافة
زى ما دخلنا زى ما خرجنا
هو ده بقى التدريب اللى بتقوله عيه
طيب انا مستفدتش حاجة
لا لا لا انتى مفتريه
مش الراجل الاولانى اداكى طريقة التحضير الجديدة انتى هتنهبى
ماشى خلاص بقى هى دى مصر الحلوة
اااااااااااستنوا نسيت اقولكم اظرف ما حدث فى التدريب
واحنا فى المحاضرة كانوا بيمرروا علينا ورقة نسجل فيها اسمينا
ولما وصلت للموجة لقيت اللى حاضر 40 مدرس فقط
فراحت قيللنا لو سمحتم يا جماعة اللى معاه مدرس دراسات اجتماعية فى المدرسة
يكتب اسمه حتى لو مجاش
انا عايزة الورقة مليانه اسامى
مش كنت كبرت دماغى ومروحتش وقولت لصحابى يكتبوا لى اسمى
اهى مرة وعدت
واكيد التدريب اللى جاى
هبقى افكر كويس
اروح ولا مروحش
تفتكروا انتم اعمل ايه؟؟؟
اروح ولا مروحش
22 comments:
مش هقولك اكتر من
تبقه انت اكيد في مصر
وبلاش تسيح بقه يارودى
ياريت تعملى موضوع عن المرتبات
وعن الطلاب
وعن؟؟
وعن؟؟
انا معرفهاش
ايه الكلام الكبير ده يارودى والله ده حال مصر
وعلى فكرة ده مش غلطتهم ده غلطنا احنا اننا اشتغلنا فى المهنة ده والا حتى غرها احنا اسلم حل نتجوز ونقعد فى البيت
او
فى حل تانى
نعمل حاجة وعلى راى ناااااااااااس
اعملوا من الفسيخ شرباات
هههههههههههههههههههههههههههههه
انتى بتروحى فين يا بنتى
لا بتكتبى ولا بتعلقى ولا حد يعرف انتى فين
وبعدين انتى مستغربة اوى كدة ليه
اللى بيحصل ده بقى طبيعى فى مصر
انا كتبت موضوع قبل كدة بيتكلم عن حاجة شخصية بتحصلى بس الحقيقة انها حالة عامة وهى ان احنا عايشين فى حالة من
التهريج المنظم
كل حاجة فى حياتنا بقت تهريج بس بنظام ومواعيد بس كلنا بنضحك على بعض وفى الاخر بتخرب علينا برضة
بس هنعمل ايه ربنا يكملها بالستر
امنيه
عن قريب يا منمن
هعمل كل اللى انتى عاوزاه
بس حبه حبه
علشان الناس متخدش من اللى هقوله
اما من ناحيه انك متعرفنيش ف ده طبعا
لا احنا بندرس فى مدرسه واحده
ولا احنا بنروح مع بعض كل يوم
ولا حتى بناكل مع بعض سندوتشات كبده كل شويه ولا حاجه خالص
انتى مين يا بت انتى
شهد الحب
مهما عملتى يا بنتى
اللى فيه داء عمره ما هيخف
انتى بتتكلمى فى ايه
ماهى اصلا منظومه فاشله فى كل حاجة
عاوزاها تنجح ازاى
وبعدين شكلك دة طالع عينك
اتمنى انك تفضفضى شويه
واهو منك نستفيد
حامد او حدوته
انت اللى فينك يا بنى
انا بجد اسفه
بس ليا عذرى
لان النت كان فاصل بقاله كتير
اما بالنسبه للتهريج المنظم
فده عندك حق فيه
لان التدريب بتاعى ده فعلا كان تهريج بس بنظام شويه
على فكرة انا اول مره ادخل المدونة
و بجد هى جميلة جدا والموضوع اللى
انت بتتكلمى فيه جميل بس هى ديه بلدنا
وهو ده الشعب المصرى
ممكن سؤال بعد اللى كتبتيه سيبه الشعار بتاع بنحب مصر مش هنبطل مش هنسافر مش هنسيب ليه؟؟؟؟؟؟؟؟؟؟؟؟
سمسمه
انتى الاجمل يا سمسمه
وميرسى لزيارتك يا قمر
وياريت متكونش الاخيره
انيميوس
لانى بحب مصر حطى الشعار ده
ولانى مصريه اسكندرانيه
مقدرش استغنى عنهاحتى لو كان فيها عيوب الدنيا
يعنى زى مامتى ممكن تكون مليانه عيوب
بس انا شيفاها احسن ام فى الدنيا بالرغم من انى عارفه عيوها
وبعدين هو مين اللى خلاها وحشه مش احنا
ومين الى هخليها جميله احنا برضه اتمنى انك تساعدنا فى اننا نخليها جميله
مقدرش اساعدكوا لانى ح ادخل الجيش عرفتى مين اللى كاتب شيلى الشعار دة؟
انيميوس
حوش ياوادالخدمات حوش
انت يعنى يا محمد علشان هتدخل الجيش
هتخلى الدنيا سوده عنينا ليه
والله بجد فرحانه فيك
يا واد
بس المشكله هزاول فى مين
ومين هضحكنى الصبح
يلا بقى هبقى اسجل شريط ليك كل ما افتكرك اشغلهوالله هتوحشنا يا واد
فرحانة في اهون عليكى؟؟؟؟؟؟؟؟؟؟؟؟؟؟؟؟؟ مكنتش اتوقع على فكرة انت سوداويةاووووووووووى
الواحد مننا مش بيختار لابيختار امه ولاابوه ولابلده بس ممكن يغير من نفسه ومن بلده ومن إلى حواليه بس لو فكرنا صح انتي اكيد صح لما روحتي الدورة وصح لوروحتي اى ندوه تانيه لكن الغلط انك تكوني سلبيه وتعملي زى غيرك ومتروحيش يمكن تكوني مستفدتيش من الدورة بس أكيد انتي من جواكي شعورك واحساسك كان جميل وانتي حاسه ان فى اهتمام بيكي وبيغيرك من المدرسين حتى لو ماكنتش متنظمه كويس اكيد المره الجايه هيكون فى تنظيم اكتر وتستفادى اكتر لن نستطيع ان نغير من شئ قبل ان نغير ما بأنفسنا
رحاب انا بحيكى على التعليق الجميل دة بس لي تعليق صغير ان فى معظم المصالح الحكومة بنشوف حاجات كتير ومينفعش نغيرها وفى مواقف معينة لازم نكون سلبيين لان المدير عاوز كدة والمدير الدولة عاطياه سلطة انه يضرك ومتنسيش ان بلدنا بلد الروتين والاجتماعات والتوصيات والخطط بلد الكلام الفاضي بس ممكن يكون كلامك دة فى دول اوربا او بعض دول الخليج وعلى فكرة انا مبقولش نكون سلبيين بس فى عصر الحكومة البوليسية لازم نحدد احنا ح نكون مش سلبيين فى اية علشان منتعبش
وانا كمان يارحاب مع كلام انيميوس اسلينى احنا عن منظومة التهريج المنظمه عارفه يارحاب كنا بنقول كده في الكليه دلوقتى غصب عننا ويمكن لسه جوانا رافض للواقع ده بس هنعمل ايه وعلى فكرة دى مبقتش سلبيه دى بقت لاسف حياتنا
تحياتى
يا امنية مش انيميوس انا محمد
معلش ياسي محمد غلطنا في البخارى يعنى وعموما سورى مكنتش اعرف انو
سيدتك الكاتب التعليق
رحاب
اسفهطبعا على التاخير فى الرد
بس كان عندى فيرس ضارب النت على الكمبيوتر
بس الحمد لله
تخلصنا منه
بس بجد انتى وحشتنى جدا ووحشتنى ارائك الحلوة اللى بجد الواحد بيستفيد منها دى
تحياتى ليكى ولزيارتك الجميله
الاستاذ محمد والانسه امنيه
يا رب ترحموا بعض من المزاولة وتبطلوا لعب العيال اللى انتوا فيه ده
وبعدين قولنا مليون مرة اكتب اسمك فى الاخر بدل ما اسميك
اللى متتسماش
هههههههههه
وش بيطلع لسان
اما بالنسبه لكلامكم فاكيد صح
لان للاسف الحكومه بتاعتنا مركزيه فى كل حاجة وهى دى المشكله
Post a Comment