وصلنى تاج

طبعا احب اشكر

رومانس مشاكس

ونبض الحياة

على التاج الذيذ ده معلش سامحونى

انى أتاخرت فى أجابته

**************
اسمك؟

رودينا

المشهور بيه وسط صحابك؟

بابا الله يرحمه كان بيقولى دّوده

وصحابى بيقولولى

رودى - دودو - رورو

واللى عايز يخترع اسم يتفضل مبحبش احرم

حد من حاجة


سنك؟

ليه الاحرج ده

فى حد يسال موزمزيل زى عندك كام سنه عيب

عموما انا مش بيهمنى انا هقولكم سنى

ايه يعنى

انا عندى

18

وماشيه فى

15

هههههههههههههه

لا بجد انا عندى 24



أسم مدونتك؟

الفراشة الصغيرة


صورتك الرمزية في المدونة بتعبر عن أيه؟

طفلة صغنونة معفنه ماسكه صوبع رجلها

شوفتوا قرف اكثر من كده

ههههههههههههههههههه

هل فكرت في أغلاق المدونة؟ والسبب؟

لا طبعا - اقفلها واقرف مين يعنى



أيه رد فعلك لو حد قل أدبه عليك في تعليق؟


هربية جت عليه

منا بربى اجيال فى المدرسة

هتيجى على حته واحد قليل الادب

ههههههههههههه بهزر طبعا

هحذفة بمنتهى السهول

تعليق يفوت ولا حد يموت



أسوء مدونة؟

مدونة قطة الصحراء

وده لعده أسباب

أولا : لانها كاتبه بوست عن المنقبات

وبتقول عليهم كيس زبالة وده منتهى قلت الذوق وده اللينك بتاعه


http://catofdesert.blogspot.com/2009_02_01_archive.html


ثانيا : الشعار اللى حطاه بتاع كفايه جهل

على صورت اتنين منتقبات

ثالثا : الصورة بتاعت السلفيين تقول عليهم معفنين يييع

بجد مش عارفة أقول عليها غير

حسبى الله ونعم الوكيل


هيحصل أيه للإيميل بعد ما تموت؟

هتعيط علشان مش هتلاقى حد يسال فيها



عطيت الباسوورد لحد قبل كده؟

تؤتؤتؤتؤتؤتؤ

دى أمنيه حياة اخواتى انهم يخدوه

ومعرفش أقعد عالنت تانى

بس على مين

أختكم ناصحه



السفر بالنسبة لك؟

بعشقة فى الشرقية

عند اهل بابا حياة بجد جميلة جدا

ريف وزرع وخضرة وبدائية جميلة

بنسى فيها كل هموم الدنيا

وناس جميلة وعيلة كبيرة

مش ببطل معاهم ضحك



المود بتاعك ايه؟

كل ساعة فى حال

اللى أحبه انهارده اكره بكره

وممكن تضحك عليا بمصاصة

غالبا بحب الضحك

بس لما تقلب نكد ييييييييييييي

ببقى ايه تكنه على الاخر

بتعمل أيه في وقت فراغك؟

بكتب خواطر أو اقعد على النت

أو ارسم أو ارقص أو اقرا كتاب

الأكلة المفضلة؟

ساندوتش تشيكن سبايسى

من عند مؤمن ستانلى

اقعد انا ومنمن انتيمتى فوق فى مؤمن قدام البحر

ونحكى لحد لما نزهق

وعلى فكر لينا تربيزة معينه هناك



الصفات التي أخذتها عن والدك؟

الطيبة

الضمير الصاحى والامانة

العشرة والاجتماعية

حب الناس ولو فى ايدى أخدم حد متاخرش عنه


الصفات التي أخذتها من والدتك؟

الحنية اللى ملقتهاش فى حد

العصبية للاسف


اكثر ست حاجات بتحبهم؟

بعد ربنا وماما وبابا طبعا

البحر

السما

الفراشات

انس ابن بنت خالتى لما يعيط ووشه يحمر

الكبده

أصحابى



اكتر ست حاجات بتكرههم؟؟
الكذب

الظلم

الناس المملة

الناس المغرورة

العيال الرزلة

العيال الزنانة


شخصيتك نوعها أيه؟

منا قولت مزاجية

لما اكون رايقة بحب الهزار جدا لكن لما اكون مكتئبة

مش بحب أكلم حد علشان ميبقاش دمى تقيل


لماذا دخلت عالم التدوين من الأساس؟

بالصدفة

اساسا انا معرفتش المدونات غير من

صديقى اللدود هشام علام

وكنت لما بعلق عنده

لازم أكتب اسمى تحت

فكنت بضايق قوى اشمعنى هما كاتبين اسمهم

بالازرق فوق وانا اكتبه تحت

فلازم اعمل زيهم المهم سجلت نفسى فى جوجل

واتارينى كنت بعمل مدونة

والاخر حصلت المأساة وفتحت مدونة

أحلى جملة قيلت في وصف مدونتك؟

هى جمل كتير قوى

بس احلى جمل لما الاقى حد

مدون جديد بيقولى مدونتك حلوة

واول مرور له ومش هيكون الاخير

بحس انها عملت معاه


أهمية التعليقات بالنسبة لك؟

زى الترمومتر

اللى بيقيسوا بيه الحرارة

بس الفرق الوحيد

الدكتور دايما عايز الحرارة منخفضة

اما انا عايزاها دايما عاليا


احلى بوست كتبته؟ وضع اللينك ثم أذكر السبب؟
كله زفت

وانا أكتب حاجة عدله

ههههههههههههه

لا بجد البوست بتاع عيد ميلادى اللى فات

http://rodebutterfly.blogspot.com/2009/01/blog-post_22.html#links

لانى أتكلمت فيه عن ناس كتير بحبها


افضل مدونة قرأتها؟
كتير والله

مصر لسة فيها مبدعيين

الشغل بالنسبة لك؟

حياتى

من غيره محسش انى موجوده



الأنترنت بالنسبة لك؟

وسيلة لقضاء وقت الفراغ



تمرر التاج ده لمين؟

كيمو

علشان يفتتح مدونته بقى


ماء تشرين

علشان عارفه انها

مش بتحب التاجات وهتموتنى

رومانسى
أفتكر انه لسه مجاوبش التاج ده

ربنا على المفترى

طبعا هتقولولى يا ساتر يا رب مين المفترى هقولكم

أولا : المفترية الكبيرة "الكابو" شيماء مهدى صاحبة مدونة حنين و أحمد

الناس كلهم بيبعتوا تاج واحد لكن شيماء كرامها زايد حبتين

بتبعت تاجين ربنا على المفترى

لاومش كفاية هى

تظهرلك كمان المفترية التانية أمنية صاحبة مدونة ماء تشرين بتاج علية

استنوا علشان تعرفوا قد ايه انا غلبانة لقيت المفترية الثالثة رحاب صاحبة مدونة فى حب الله بعتالى تاج

بس انا قررت مردش على اخر تاج عارفين ليه

لسبب بسيط جدا انه مكرر وهو نفس التاج اللى بعتاه امنية

عموما ربنا على المفتري

والله لربيكم وهتشوفوا الوش التانى يا مفتريين

عموما علشان تعرفوا انى طيبة مش هزعلكم وهرد على التاج

وابعته لعشرة اقرفهم فى حياتهم

بس يارب ميدعوش عليا

يلا استعنا على الشئة بالله

-----------------

التاج الأول

*******

بدأت تدون من امتى ؟ودخلت العالم ده ازاى ؟

يوليو 2007 , ودخلت العالم ده بالصدفة وافتكر انى حكيت ازاى دخلت العالم ده قبل كده للى متابع مدونتى

اية كان انطباعك فى البداية ؟

صراحه كنت ببقى فرحانه قوى لما الاقى مدون جديد دخل عندى وكتب تعليق يعزز فيه كتابتى او وجه نظرى

وكنت فرح اكتر لما الاقى حد حب مدونتى وبقى زائر ليها باستمرار

مين اكتر واحد بتهتم بتعليقة على بوستك الجديد ؟

ياااه ناس كتير قوى خايفه اقول حد وانسى حد

انا بحب اى تعليق يكون بناء مش هادم حتى لو كان من شخص مجهول

مين اتعرفت علية من خلال المدونة ونفسك تتعرف علية فى الحقيقة ؟

رحاب صاحبة مدونة فى حب الله

دكتور عمرو صاحب مدونة كلام من القلب

الستة بتوع صيدلة

حامد صاحب مدونة حدوتة

اية اكتر حاجة اتعلمتها من عالم التدوين ؟

ان الصمت اجابة بارعة لا يتقنها الكثيرون

اية اكتر حاجة كرهتها ؟

ان فى ناس كتير بتكتب كلام حلو حتى لو مش مؤمنه به لمجرد انها تعجب الناس

أو انا تفرقع فكرة علشان مدونتها تبقى حديث المدونات حتى لو كانت بتنشر افكار غلط

واللى يغيظك اكتر لما يجى تعليقات على التدوينة دى تقوله انه صح وبيفكر صح

زى مدونة لقيت فيها المدون بيعلن انه علمانى وانه عايز الناس تتناقش معاه بالعقل والمنطق مش بالحديث والقرأن

وكان مضايق قوى لما حد يكتبله ايه قرانيه

المشكلة الاكبر بقى ان فى ناس كانت متفقة معاه ومش عارفة استفادوا ايه

عموما ربنا يهديهم

ممكن تدى مثال عن اللى انت بتحلم تلاقية ؟

ان الدنيا تفضل لسة بخير

حاسس أن التدوين له تأثير ؟

اكيد اختلفت 180 درجة بعد ما دخلت عالم المدونات

طيب كلمة أخيرة ؟

كل سنة وانتم طيبين

ومحدش يبعتلى تاجات تانى

أوجه التاج ل ؟

خلى اجابة السؤال ده فى الاخر علشان الدعوة تبقى واحده

هييييييييييييييييه خلصنا من الاول

--------------------------------------

التاج الثانى

*******

أذكر 5 أحلام على الاقل تخص ماضيك وتحلم فيها بالتغيير أشياء ماذا ستعدل وماذا ستترك ؟

هو كان اكتر حلم عندى وانا فى الثانوى انى ادخل كليه تربية واكون مدرسة واشتغل وانفع العيال

لكن دلوقتى انا موافقة على النص الاولانى منه لكن الشغل يكون فى مكان تانى غير اللى انا فيه

أذكر 5 أحلام على الأقل تخص مستقبلك ؟

1- ان اكون مدرسة ناجحة متميزة فى شغلى

2- ان اكون ام وزوجة صالحة

3- انى اعمل كل ما يرضى الله سبحانة وتعالى

4- انى افتح حضانة واكون مسئوله عنها واعمل كل الافكار الجديدة اللى فى دماغى

5- انى اعمل حج او عمره

أذكر شخصين على الاقل متواجدين فى حياتك حاليا كنت تود وجودهم قبل الان بزمن ؟

أمنية ومحمد

أذكر شخصين على الاقل غير متواجدين فى حياتك حاليا كنت تود وجودهم الان او فى حياة أولادك مستقبلا ؟

ابى رحمه الله اكتر انسان كان نفسى يكون معايا دلوقتى

لمن تهدى هذا التاج ؟

ما قولنا خلى اجابة السؤال ده فى الاخر

وادى التانى خلصنا منه نخش على التالت

---------------------------

التاج الثالث

*******

س1- الحالة الجسمانية بمعنى هل سيادتك تتمتع صحة جيدة ولا الأخ صاحب مرض ؟

الحمد لله الصحة فل وعال العال

س2 - الحالة العقلية بمعنى هل تشعر ان عقلك يعمل ولا حضرتك مفسى دماغك ؟

هو حتى الأن يعمل والحمد لله ممكن بكرة يفسى المهم معاك بقى منفاخ ننفخه

س3 - الحالة الاجتماعية بمعنى هل علاقتك بمن حولك جيدة ولا عامل مشاكل مع طوب الأرض ؟

بص بقى انا من ناحية المشاكل مش بحبها بس اختلاطى بالناس ده يقف على الحالة المزاجية يعنى انا بحب الهزار والضحك الكتير بس لما يكون مزاجى ومودى وحش تلاقينى ببعد عن الناس بطريقة غريبة حتى مش بحاول احتك بحد ولا اتكلم مع حد علشان ميبقاش دمى تقيل

س4 - الحالة العاطفية مش محتاجة تفسير ومش عايز استعباط ؟

بحب طبعا هو فى أحلى ولا أجمل ولا ألطف من الحب

طبعا بحب ماما وبحب اخواتى وبحب اصحابى فى حد يكره الناس الحوه دى

س5 - الحالة الروحية بمعنى هل علاقتك بربنا كويسة ولا الكلام على أبو لهب ؟

الحمد لله انا راضية عن علاقتى مع ربنا وخصوصا بعد رمضان ده

لانه كان نقطة تحول فى حياتى بس ربنا يتقبل منى ان شاء الله

الخمس اسئلة اللى جاية دى اسئلة متنوعة من اختيار العبد لله واللى هو فى نفس الوقت منه لله

الأول : اكتر عيب فيك ونفسك تتخلص منه ؟.

انى لما اخد قرار امشى فيه للاخر حتى لو قابلتى اى عقبة متوقفنيش وافضل عند قرارى ومرجعش فيه

الثانى : اية الحاجات اللى عملتها وندمت انك عملتها قوى ؟

مبحبش كلمة ندم دى خالص لانها بتخلينا تقول لو مكنتش عملت كذه كان حصل كذه و"لو" دى من عمل الشيطان

فدايما لما بعمل حاجة حتى لو كانت غلط مش بندم وبقول اكيد ربنا له حكمه فى ده وحتى لو انا غلطت فاكيد استفدت من غلطى

الثالث : اية الحاجة اللى لسة معملتهاش وهتموت وتعملها ؟

انى اعمل حج او عمرة وازور المسجد النبوى

نفسى قوى من ايام الكليه انى اطلع ربنا يكتبهالى عنده ان شاء الله

الرابع : اكتر دعاء بتقولة وبتردده دائما ؟

اللهم انك عفوا كريم تحب العفو فاعفوا عنى

يارب يا مقلب القلوب ثبت قلبى على دينك

خامسا : لو عرفت انك هتموت دلوقتى وقالولك اخر حاجة نفسك فيها اية ؟

انى ادخل الجنة

اهدى التاج الى ؟

طبعا انا قولت فى الاول حهديه لعشرة اول تلاتة هيجاوبوا على نصه الاولانى لانهم جاوبه على التاج الاخير وهم

ماء تشرين

حدوتة

فى حب الله

اما باقى العشرة هيجاوبوا اجبارى

كلام من القلب

سفاح كرموز

الستة بتوع صيدلة

ضى القمر

طهقانة

عاقلة على ارض الجنون

سنو وايت

شوفتوا بقى العدية بتاعتكم حلوة ازاى

كل سنة وانتم طيبين

هييييييييييييه واجب

هذا الواجب من الجميله رحاب

بس ايه واجب على حق

منا طول عمرى بدى واجب للعيال وبعاقبهم لو معملهوش

معلش بقى يا رحاب

انا اتأخرت فى عمايل الواجب

اوعى تضربنى اقول

وقفنى طول الحصة وبلاش تضربنى

علشان ايدى هتوجعنى

السؤال الاول : أذكر اسم من طلب منك حل هذا الواجب؟

طلبته منى رحوب صاحبه مدونة فى حب الله

ويااااااارب اعرف اعمله

السؤال التانى : أذكر القوانين المتعلقة بهذا الواجب؟

هو قانون واحد مشهور عند كل الناس

if you want happy

ارمى الكتاب وصلى على النبى

السؤال الثالث : تحدث عن ستة أسرار قد لا يكتشفها من يقابلك للمرة الأولى؟

1) ممكن اى حد يتخم فيا ويفتكرنى هادية بس مجرد ما اتعود عليه يعرف الحقيقة المرة

2) بيبان عليا انى جريئة ومش بيهمنى حاجة بس أنا من جوايا ببقى خايفة جدا جدا

وبحاول اتماسك علشان ميبنش أى نقطة ضعف ليا

3) ناس كتير بتفتكر أن دماغى طئه وانى مبعرفش اتكلم جد

بس لا

أنا اه بحب الهزار بس برضه وقت الجد جد ولما حد يتكلم معايا فى موضوع بيلاقى واحده تانية

غير رودى المرووشة

4) صدقاتى المتعددة تعطى انطباع انى حبيت كتير قوووووووى

بس انا فى الحقيقة محبتش فى حياتى كلها الا مرة واحده

وكانت احلى سنه قضيتها فى حياتى كلها

5) انا ممكن انصح الناس كلها لكن معرفش انصح نفسى

ومتردده فى أى حاجة تخصنى لأنى بخاف قوى من الفشل

6)لما بحط حاجة فى دماغى بعملها أيا كانت الحاجة دى

وأيا كانت نتائجها ولما بتكون نتيجة افعالى خطأ

بقعد اقول لنفسى احسن علشان مأخدتيش بالك من كذه وكذه وكذه

لكن لو نتيجة افعالى حاجة كويسة يااااااااااااه على الفرح والظئططه اللى ببقى فيها

السؤال الرابع والاخير : حول هذا السؤال الى ستة مدونين

وأذكر اسماءهم مع روابط مدوناتهم فى موضوعك؟

اممممممممممممممممممممم

استنوا كدة لما افكر

بصوا احسن حاجة

اول سته مدونين يعلقوا عندى ليهم الواجب ده هديه

سوفنير يعنى

والنبى قبل الهدية

من انا؟

يعنى يا ربى أول تاج ليا يبقى صعب كده

ماشى يا بريك

ايه يا رودى وانا عملتلك ايه

اصل اصعب حاجة ان حد يتكلم عن نفسه

لانه لو اتكلم حلو هيقولوا عليه مغرور

ولو اتكلم وحش هيقولوا عليه مبيثقش فى نفسه

عموما انا هتكلم وسيبوا اللى يقول يقول بقى

استعنى على الشقى بالله

أولا : أكتب عشر اشياء عن نفسك

------------------------

1-اسمى رودينا

وبشتغل مدرسة دراسات اجتماعية فى مدرسة ابتدائى

وبلاش اقولكم على اسم المدرسة لأن اسمها وحش قوى

2-وانا صغيرة مكنتش بحب اسمى خالص

لان فى ناس كتير كانت فاكرانى مسيحية فكنت بضايق وأقول لماما

فبقت تلبسنى ما شاء الله علشان يعرفوا

وبرضه مفيش فايده

3-مشكلتى انى رقيقة ودلوعة والله مش بصطنع بس انا كده

لأن بابا الله يرحمه كان بيدلعنى كتير قوى

وكنت لما اتكلم زى اخواتى الصبيان حبه كان يزعقلى

ويقولى انتى بنوته والمفروض انك تكونى رقيقة

بس المشكله الاكبر ان مستر وليد زميلى فى المدرسة بيقولى يا بنتى حرام عليكى

هتخلصى رصيد الرقة والدلع اللى عندك وتقلبى على دكر بعد الجواز

4-اللى يشوفنى وميعرفنيش يقول عليا تكنه وهاديه

بس اللى يتعامل معايا يحس بكمية الشقاوه والشيطنة اللى مخزونة عندى

5-بحب قوى ازاول الناس وخصوصا اصحابى وبعمل فيهم مقالب كتير قوى

ودايما اعمل فيهم كل حاجة واقولهم كذبه ابريل بس من الواضح ان الشهور عندى كلها ابريل

ومع ذلك أنا بكره الكذب جدا جدا جدا ومش بسامح بسهوله

6-من مواليد شهر واحد شهر العباقرة يعنى

ده انا طبعا انا عارفه والله من غير ما تشاوروا علياو تقولوا عبقرينوا

7-انا مواليد برج الدلو برج هوائى وانا فعلا كده

الحاجة اللى احبها انهارده اكرها بكره ومن السهل انك تقنعنى بأى حاجة

وتضحك عليا بمصاصة هههههههههههه

8-بحب جدا الحرية والاستقلال والصداقات المتعددة

واحب اعمل اللى انا عايزاه بدون اى قيود ومحبش حد يفرض عليا رأيه

او يفرض عليا اى حاجة لأنى عنيده جدا ومبنفذش الكلام طول ما أنا مش مقتنعه به

9-ذاكرتى ضعيفة نسبيا علشان كده تلاقينى دايما عاملة رسائل تذكير على الموبايل

ولما بيرن مش بفتكر انا كنت عملاها ليه اساسا

وتلاقينى قاعده افتكر انا عملت الرساله دى امتى علشان افتكر ايه هو اللى انا عايزه افتكرة

10- بحب بابا وبدعيلى دايما بالرحمة

وبحب ماما واخواتى واصحابى وبحبكم كلكم

ثانيا : وجه التاج لخمس تانيين

---------------------------

مأتشرين

شهد الحب

فى حب الله

سفاح كرموز

حدوته